水貨問題激民怨 分流旅客待何時

嗱，繼上水有水貨倉懷疑被人縱火後，日前又有激進團體發起「光復屯門」行動，圍堵做水貨客生意嘅商場及店舖，卒之引發警民衝突，七國咁亂。一波未平一波又起，搞完屯門，又到沙田，網上有人號召周日「捍衞沙田」，到時唔知又會亂成點。

正如有人話齋，香港係好客之都，面對任何旅客都必須以禮相待，唔能夠透過滋擾社會秩序去表達不滿。咁又係呀，內地旅客來港消費，帶動經濟，本來係好事，點知遇到嘅唔係「驅蝗」就係「光復」，簡直係貼錢買難受，一旦內地旅客望而卻步，旅遊業無以為繼，香港經濟隨時死得都似。

不過咁，針無兩頭利，隨着旅客不斷增加，水貨問題愈來愈猖獗，內地客逼爆車站，推高物價，居民的確有苦自己知。面對民怨沸騰，當局例牌話會成立跨部門小組，作出多方面協調，減少對市民嘅滋擾喎。講係咁講啫，弊在水貨客前赴後繼，源源不絕，點樣跨部門協調都唔係辦法。呢，有法官審理違反限奶令個案時，都忍唔住直斥中國人唔敢用中國貨，係國恥同悲哀，可見水貨問題嘅根源不在於香港，而在於國產官僚不作為。

有頭髮邊個想做瘌痢吖，如果唔係品質監管形同虛設，中國製造等同假冒偽劣嘅代名詞，國人又使乜冒住「蝗蟲」罵名周圍掃貨喎。深圳市官員就講得啱嘞，水貨問題源於內地食品安全問題比較嚴重，令內地人大量湧港購物，會同香港合力解決問題咁話。

知恥近乎勇，內地官員肯正視問題，點都好過一味扮鴕鳥，不過咁，呢個係雙方面嘅問題，內地當局固然要加強監管，港府都唔可以乜都唔做。有政黨聲稱聯同鄉事委員會喺落馬洲覓地興建臨時購物城，模式類似英國嘅貨櫃商場，希望趕及十一黃金周啟用，目前正同政府部門協商。嗱，喺邊境設立購物城，到時內地客同本地居民分流，商戶既可做生意吸金，又可減少摩擦，一舉兩得，何樂而不為吖。

講多無謂，行動最實際。唔該港產官僚唔好再懶懶閒，否則，萬一民怨火山爆發，大家都無運行嘅咋，叮！