車位月租八千五 樓價升到人都癲
成日話中港融合，其實點融合都好，始終隔咗條深圳河，內地人睇香港問題，始終都有偏差嘅。呢，最近有內地媒體分析點解香港好少塞車，結論居然係港人比較環保，加上公共交通網絡發達，市民冇乜買車意欲喎，你話係咪笑大人個口吖。
斷估寫呢篇文嘅朋友未嚟過香港，即使嚟過，亦未試過繁忙時間搭車過紅隧，否則唔會噏得出「香港好少塞車」呢類咁違反常識嘅嘢。當然喇，比起北上廣等內地大城市，香港交通係暢順少少，條街亦冇咁多私家車，但絕對同環保、公交無關。咁真正原因係乜呢？與其聽內媒「分析」，不如睇本報報道好過啦。
嗱，家陣上車細盤升到嘭嘭聲，原來車位更加係升破天價。好似港島西一個屋苑咁，一個車位月租盛惠八千五百大元，刷新全港紀錄。一個車位啫，月租竟然拍得住新界兩房細單位，仲有冇再誇張啲呀。哈，就係有。元朗有個屋苑嘅車位，啱啱以一百零六萬易手，創同區二手車位售價新高之餘，短短兩年幾更加升超過一點三倍，問你服未。
所以話啫，香港人唔買車，焗住同水貨客逼巴士逼東鐵，你估真係好似高官咁講，貪同人可以「親切接觸」咩，都係迫於無奈嘅咋。以前啲人講「四仔主義」，除咗屋仔、老婆仔、BB仔，仲有車仔，試問邊個唔想晉升有車階層吖，問題係買車容易養車難，淨係泊車費都唔係人人頂得順，加上油魔肆虐，養部車一闊三大，條數都咪話唔襟計。
講番車位問題，正如有投資界人士話齋，無論係一手新盤抑或公屋，車位供應都嚴重不足，僧多粥少咯喎，唔炒到癲至奇啦！其實講嚟講去，咪又係「地從何來」嘅問題。試諗吓，人可以唔揸車，但唔可以冇屋住，家陣連起屋都話搵唔到地方，更何況車位呢？
提起搵地起屋，真係火都嚟埋。港府口口聲聲「寸土必爭」，「見縫插針」，實際上淨係識玩花招，咩延長居屋禁售期呀，咩「居屋三級制」呀，有姿勢冇實際。老實講，供應一日唔增加，玩乜數字遊戲都冇用，就好似飢腸轆轆嘅乞丐討論一雞三味定一雞十味好食啲，到頭嚟咪又係得個講字。
難為發展局局長「波叔」仲好意思呻政府覓地建屋阻力重重，「粒粒皆辛苦」，查實市民忍受你哋呢班食塞米嘅廢官咪仲辛苦，叮！
