城中鏡:恒地新地勁賺 四叔開心度假
羊年將至,市面嘅氣氛亦都愈來愈熱鬧,尋日人稱四叔嘅恒地主席李兆基就提早同市民拜年,事關佢新春會一如往年咁出埠過節,所以提早賀羊年,四叔嘅賀詞就係「祝願羊年,香港和氣生財,百業興盛,人人安居樂業。」
四叔提早拜年,祝香港和氣生財。(資料圖片)
「和氣生財,百業興盛」呢兩句話真係值得玩味,經歷佔領事件之後,香港好多人都對一團和氣有更深領會,四叔呢句拜年吉語真係好啱聽。
講番四叔,佢一直唱好地產,仲身體力行集中買佢兩隻愛股恒地同新地,由舊年年頭密密買,到依家臨近業績期先至暫時停手,帳面計賺咗好多,雖然對四叔嚟講只係濕濕碎,但贏咗牙骹去度假,相信先係四叔最開心嘅。