城中鏡：奧巴馬弟 韋綺珊 琴歌合演播善心
美國總統奧巴馬嘅同父異母弟弟馬克近日來咗香港，出席一個慈善音樂會記招時，更即席表演鋼琴，○二年去咗內地，曾經擔任過英文老師嘅馬克仲晒吓普通話，趁農曆新年將至，祝賀現場嘉賓：「新年快樂，身體健康！」
馬克與韋綺珊合作一曲後，稱讚對方歌藝不俗。
無練過都合拍
馬克今次係來港出席慈善音樂會活動，演唱會中亦有佢嘅創作。佢透露從十一、二歲開始便學彈琴：「當我第一次見到媽媽彈鋼琴時，就已經愛上咗呢種樂器。」記者會上，馬克都同歌星韋綺珊合作一首《moon river》，雖然兩人冇練過，但都好合拍，馬克仲豎手指公稱讚拍檔。
講到同慈善音樂會統籌召集人趙曾學韞（Alice）結緣？佢話：「有一次喺北京出席慈善活動，影大合影嗰陣我唔知自己應該坐邊，當時Alice叫我坐佢隔籬。佢同我講咗佢做好多關於小朋友嘅慈善工作，加上我自己都有個好艱難嘅童年，所以覺得佢做嘅嘢好有意義。」
