舉辦咗兩年嘅瑪利諾修院學校盆菜籌款宴今年又添食,籌委會成員之一嘅前民政事務局常任秘書長李麗娟(媽打)夠號召力,今年破晒紀錄開夠一百二十圍,合共籌得一百五十萬元。多位名人校友齊話當年,前立法會秘書長吳文華(Pauline)就大爆當年為學校奪得第一屆中文辯論比賽冠軍。

李麗娟(中)、王嚴君琴(右二)齊撐母校,與港大校務委員會主席梁智鴻(左二)、梁太馮令儀(右一)及王守業(左一)一起品嘗滋味盆菜。

吳文華難忘當年代表學校贏得中文辯論比賽冠軍。

蔡李惠莉(左)同大女蔡加敏(右)現身支持。

適逢該校九十周年校慶,新舊校友濟濟一堂,操場座無虛席,除Pauline外,前財經事務及庫務局副局長梁鳳儀、小學部校監余黎青萍、大新銀行主席王守業夫人嚴君琴齊捧場。

蔡李惠莉拍心口贊助

Pauline憶述,當年由德望中學轉到瑪利諾讀預科,即以隊長身份帶隊參加中文辯論比賽,成功砌低多間名校奪冠,可惜佢畢業後未有投身法律界,否則睇怕今日已做咗金牙大狀。

拍心口贊助逾百圍盆菜嘅保良局副主席蔡李惠莉,就帶埋大女蔡加敏、女婿馬鴻銘及孫兒亮相,見到盆菜上嘅惹味豬皮,蔡太話明知肥膩都要食多兩啖。講起瑪利諾,原來佢女兒蔡加怡係舊生,當年蔡太日日去接放學,諗起依然好回味。同樣令人回味嘅,仲有前民政事務局常任秘書長楊立門同拍檔即興唱番首《相逢何必曾相識》,引來台下尖叫聲。

搞手媽打話,盆菜圍數爆晒燈,喜出望外,但佢轉頭幫中文大學籌款,就無咁順利喇。佢話自從佔領行動後,唔少大孖沙對班大學生好有意見,捐錢意欲大減,但佢話唔放棄,會迎難而上,落力游說喎。

第一手消息請下載on.cc東網iPhone/iPad/Android/Windows Phone Apps