喺壹全霉虛耗人生，時間真係過得特別快，數數吓，仲有個零禮拜就過年喇。其實對本虫嚟講，農曆新年無嘢值得開心，最簡單，個個到時到候伸手要本虫派利是，就已經夠萬惡啦！喺本虫眼中，下屬只有兩種，一種係垃圾，一種係垃圾之中嘅垃圾，憑乜嘢拎我封利是？真係火都嚟。

大家都知道，我哋報人基本上無固定假期，即係年三十初一二三四五六七都可能要返工。唉，本來行業如此，無乜嘢好怨，衰在我一年365日喺堆填區對住班垃圾，已經激到半生不死，連過年都擺脫唔到佢哋，點會唔抑鬱？

慘事點止咁少？喺淫賤黎呢個不問能力、只要擦鞋嘅腦細麾下，我哋打工仔過節送大禮，又點慳得？唔好話我小心眼，記得有一次新年，本虫份禮只係普通咗少少，就畀淫賤黎蹂躪咗成年，日日拳腳招呼，你話，以後送禮，又點敢唔夠秤呢？命苦呀！

第一手消息請下載on.cc東網iPhone/iPad/Android/Windows Phone Apps