政壇：搞搞政：白鴿黨同高官鬥幼稚
民主黨（白鴿黨）本月二十七號嘅二十周年黨慶，變成政圈小風波，究竟有冇官員出席個問題被無限擴大，夾心人係做過白鴿副主席嘅運輸及房屋局局長張炳良，佢曾經應承咗會出席，但其後網站又有消息話佢會缺席，尋日，幫白鴿黨籌款嘅李華明喺電台大呻，又話政府此舉如同向該黨「開戰」，咁肥仔明嘅說話都好似同張炳良過唔去啫！
設計圖片及對白
反國教拒赴宴 政府「回禮」
白鴿黨慶本來係小事，但白鴿卻有心發大件事，仲早早放風話邀請咗好多政府高官出席，但冇乜人肯去，似暗示有政府中人同佢哋搞對抗，結果搞到一眾高官成為被追訪對象。
點解班高官要缺席該黨黨慶？尋日傳出另一個版本，話說三年前梁振英上任特首後，打算請全體立法會議員食飯，但當時反國教風波群情洶湧，白鴿黨講到明唔想一味風花雪月兼浪費時間，所以拒絕赴會。聽聞就係呢個原因，今次政府決定「回禮」，缺席白鴿黨黨慶。
不過，白鴿黨呢頭喺議會玩不合作運動，嗰頭又邀請班官員出席黨慶呢？究竟係想不合作定要畀面呢？個世界唔係你想點就點嘅，總之張炳良就慘喇，夾心人唔易做，咪以為攬成一舊，就一定係fd得o架。
