政壇：梁志祥防快必唔理財會？
區議會選舉年底殺到，地區早已展開暗戰或明鬥，人民力量譚得志（快必）早有心從政，去年開始密密到天水圍天耀選區做地區工作，聽聞想搶奪民建聯雙料議員梁志祥個議席。要守住議席嘅梁志祥話快必有一定威脅性，佢都要再強化地區工作至得，仲講笑話，就算唔開立法會財務委員會（財委會），都要返去元朗做好地區工作。嘩，雙料議員嘅意思應該係兩倍努力喎，而唔係每份做少啲喎！
設計圖片及對白
快必由去年農曆新年開始，跟人力新界西立法會議員去天水圍天耀區幫手寫揮春，跟住就打蛇隨棍上，兼職做社區總幹事，跟過輕鐵巴士重組、屋邨晾衫架等民生議題，區選雖然仲有大半年，但快必有所圖就係人都知。
梁志祥就話，佢近年專注立法會，少咗返元朗做地區工作，自己都見過快必喺區內寫揮春。佢講笑話，好彩快必唔算好勤力，否則佢為保議席，就算犧牲唔開財委會，都要返地區做吓嘢。佢仲透露，已經同黨友譚耀宗講咗，相信財委會都唔爭佢嗰一票咁話。
未懼「光復」行動滲元朗
講到區選，佢透露今年自已選區由九座樓縮減至六座，預計選票亦會隨之由二千六百票減至一千八百票。佢承認，自佔領行動後，區內部分年輕人對建制派有啲反感，加上快必嘅攻勢，唔多唔少令佢感到有啲壓力。不過，佢笑笑口話自己喺元朗區咁多年，睇住唔少人由小朋友變成青年人，好多街坊亦睇住佢工作多年，相信仲有一定嘅支持者。
另外，上周日有網上組織發起「光復屯門」遊行，最終演變成街頭混亂。梁志祥就唔擔心「光復」行動蔓延至元朗，原因係元朗嘅水貨客分散喺新田、洪水橋等地區，唔似屯門咁集中。加上元朗原本已經好多人，尤其係大馬路附近，如果突然湧多幾百人入嚟，隨時令該區交通癱瘓，只會增加居民對佢哋反感喎。
