尋日係「無止橋慈善基金」舉行第四屆無止行慈善步行籌款,中文大學校長沈祖堯、環境局局長兼無止橋榮譽顧問「星星」黃錦星齊齊以一身運動裝現身,其中沈校長仲自爆兩年前到甘肅,落手落腳為當地居民建橋時差啲幫倒忙。

沈祖堯(右起)、紀文鳳同黃錦星齊齊現身支持慈善步行籌款活動。(受訪者提供圖片)

星星「落水」撐活動

話說當時撞正下雨,建橋時要經常「落水」,沈校長有次睇見幾位中大學生喺度搬木,便走上前幫手,唔知係咪學生太過信賴佢嘅關係,竟然立即放手畀佢去搬,誰知該木頭其實非常重,差啲將成個木頭丟掉。

星星就憶述當地獨木橋好簡陋,有次企喺橋上時唔小心跌落水,但佢轉頭見好多當地村民跌落水係家常便飯,所以都實行「落水」支持活動。

講番今次步行籌款活動,無止橋發起人紀文鳳透露今年籌到七十萬元,將用喺建設同營運甘肅省嘅村民活動中心,並向村民示範同推廣建設抗震環保嘅現代夯土建築。

第一手消息請下載on.cc東網iPhone/iPad/Android/Windows Phone Apps