政壇：張建宗想避靜 官府設茶道房
港人生活節奏快、壓力大，香港賽馬會慈善信託基金撥款翻新嘅香港心理衞生會賽馬會恆悅坊，前日喺大埔舉行開幕典禮，提供一站式嘅社區支援服務，入面設有Band房、日式茶道房等設施，據聞擔任主禮嘉賓嘅勞工及福利局局長張建宗對茶道房特別感興趣，笑笑口話：「問責官員都好需要呢個設施」，唔知張建宗係咪憧憬有一日，可以有時間邊歎茶、邊享受片刻寧靜呢？
張建宗（前排右二）同嘉賓主持恆悅坊開幕禮切燒豬儀式。
張建宗喺致詞時率先爆料，指本月二十五日發表嘅新一年度財政預算案將有好消息宣布，增加對社區精神病健康計劃嘅撥款，佢喺開幕禮切燒豬儀式時，仲打趣咁話最鍾意出席大埔嘅社福機構活動，皆因大埔出名美食多，當品嘗燒豬時仲食到好滋味添！
勞福局發言人接受查詢時補充，特首梁振英早前喺《施政報告》提及要為弱勢社群提供支援，包括殘疾人士、精神病患者及康復者等，相信預算案喺有關方面有更詳細嘅安排。
