政壇：搞搞政：傳獲葉劉抬轎入局 陳岳鵬棄官返政圈
眾所周知，政制及內地事務局政治助理陳岳鵬，一度係新民黨主席葉劉淑儀嘅愛將，但佢喺四年前突然辭去南區區議員身份，走入官場做特首辦特別助理，現任政府喺一二年七月上場後就出任政制局政助，前途似乎無可限量，不過近日有消息傳出一六年有重大決定，就係當政改方案大局已定，將會棄官從政還葉劉人情，代表新民黨喺香港島地區直選排名第一，盛傳下屆唔選嘅葉劉就排第二「抬轎」撐對方入局，陳岳鵬呢個官場、政界「旋轉門」係咪成真，相信好快就會有端倪。
（設計圖片及對白）
陳岳鵬喺一○年轉換跑道，之後陸續有葉劉嘅左右手先後加入官場，令匯賢智庫、新民黨一度被冠以「官職直升機」嘅稱號，但有得必有失，佢當年根據地薄扶林選區，無論係一○年補選同一一年區選都未能收復失地，自此傳出葉劉同佢一度不咬弦。
但世事無絕對，葉劉覬覦一七年特首寶座已係政圈公開秘密，有傳佢有意喺下屆立會選舉排第二，力捧心儀人選上位，據聞其中一個方案係搵陳岳鵬回歸排第一。有分析指，陳岳鵬當年棄區議員加入政府，一直覺得欠葉劉一個人情，因此只要葉劉出聲要求，佢應該唔會托手(月爭)，大有機會強勢回歸政圈，甚至「升呢」為尊貴嘅立會議員。
回應傳聞話「好笑」
陳岳鵬接受查詢時首先以「咁好笑」嚟形容呢個傳聞，強調呢個講法係第一次聽，自己從來無同葉劉講過選舉嘅嘢，現階段想做好政改工作，暫時無意離開現屆政府。但據聞葉劉心目中有數個潛在目標人選，如果佢現階段未肯露口風，又會否有其他人搶佔先機呢？
此外，早就表明棄選一六年立會選舉嘅立會主席曾鈺成，亦唔介意幫人「抬轎」，可能會喺名單排第二，力保盛傳會參加立會選舉嘅建仔副主席張國鈞，睇嚟呢場選戰將會好戲連場。
