政壇：郭國全批拉布損競爭力
泛民主派喺議會發起不合作運動，突襲負責審批基建工程嘅立法會工務小組，仲由飯盒會召集人兼公文袋黨魁「袋巾傑」梁家傑做咗主席，令多個政府工程項目撥款議案被抽起，前政府經濟顧問郭國全尋日喺電台節目上暗批泛民，擔心本港嘅政治爭拗，令到一啲本來應該通過嘅基建工程或法例無法落實，蠶食本港競爭力，又話政府必須有公信力同管治能力，先可解決到現有問題。
（設計圖片及對白）
其實，郭國全非第一人苦口婆心，暗批泛民唔應該拉布拖垮議會進度，事關財經事務及庫務局局長陳家強早前亦喺立法會批評泛民拉布，除咗令部分具爭議性嘅項目唔能夠通過，亦導致其他無爭議性嘅議程不斷積壓，佢當時仲提到，舊年十月開始至今，仲未有新工程提交財委會審批，警告若果工程進度受阻，將會令造價上升。
稱中港矛盾可創商機
老實講，好多市民都覺得泛民阻住地球轉，因工程項目造價再飆升，又會超支，咁到時邊個埋單？咪又係納稅人嘅血汗錢。
郭國全其後講到中港矛盾問題，認為雖然內地存在唔少問題，但香港人可以視呢啲為機會，例如內地污染問題，造就咗唔少香港公司喺內地提供服務，佢話近年全球流行「創業精神」，就係遇到社會問題嘅時候，唔好投訴，而係要設法解決。佢又覺得港人對內地最新嘅發展變化唔係好熟悉，呼籲本港年輕人要有國際視野，了解內地情況。
至於香港樓價同租金高企問題，郭國全形容樓價高企除咗因全球利率低外，亦因本港房屋供應出現問題，又指香港環境愈來愈擠迫，反映過去一段長時間，政府長遠投資放慢，導致基建、房屋等長遠投資跟唔上人口增長，所以有需要檢討。不過，佢強調樓市始終有周期，預計政府只要維持土地房屋供應，樓價會逐步回落。
