旺舖出現短租潮 皆因好景不常在
曾幾何時，香港一舖難求，尤其係旺區地舖，更加係皇帝女唔憂嫁，租金再貴都有人要。點知風水輪流轉，家陣消費市道逆轉，零售業好景不再，導致通街都係吉舖，唔少業主焗住以短租招客，講起都幾諷刺o架。
呢，本報記者去旺角睇過，呢個港人及旅客嘅消費熱點，竟然出現唔少短租舖，好似西洋菜南街咁，淨係賣糖果零食、電話零件、利是封等短租舖就有六間咁多，簡直令人難以相信。係人都知，旺角舖租名列世界前茅，售賣糖果零食只能賺取蠅頭小利，究竟點樣為皮呢？原來，呢啲多數係吉舖，業主話與其丟空，不如短租出去收番多少幫補吓喎。唔怪得小商戶僅以市價七成甚至一半就租到旺舖，打算趁農曆新年黃金銷售期博一博，發一筆新年財。
所以話，花冇百日紅。隨着經濟環境轉變，零售市道走下坡，旺舖吊高嚟賣嘅日子已成過去，減租潮隨時殺到。唔係杞人憂天o架，舊年十二月零售額按年下跌近百分之四，全年數字更加係十一年來首次倒退添。業界人士話喎，依家睇唔到有利好零售業嘅因素，加上政治爭拗不斷，佔領鬧劇隨時重演，前景絕對不容樂觀。
其實，咁嘅環境一早已經預咗喇。內地全力反腐，旅客消費模式改變，尤其對奢侈品嘅需求大大降低，對零售業嘅負面影響愈來愈明顯，唔少專做旅客生意嘅連鎖店被迫收縮，導致吉舖處處，連旺角呢啲旺區都唔例外。舖租面臨下調壓力咯喎，業主唔可以再開天索價，咪焗住要面對現實，就算減價短租都唔放過囉。
講開又講，以前香港經濟多元化，生意大有大做，小有小做，百家爭鳴，百花齊放，大家都有飯食。可惜隨着地產獨大，加上旅遊業興旺，舖租不斷飆升，小本經營嘅商戶已好難立足，連傳統老店都買少見少，搞到全港都係千篇一律嘅連鎖店同珠寶店、名牌店，冇晒本地特色。當然喇，業主在商言商，根據市場需求而提高租金，都無可厚非嘅，問題係殺雞取卵，遲早連雞蛋都冇得食咋。嗱，家陣通街都係吉舖，咪就係一個警號囉。
講到尾，香港經濟要持續發展，唔可以淨係靠做旅客生意，更加唔可以地產獨大，一定要多元化至得。係呢，港府咪成日話要搞乜港物港、乜產業物產業嘅，究竟幾時至可以成事吖，叮！
