泛民主派去年發起不合作運動，突襲議會、攪亂同建制派的協調機會，又喺三堆一爐和創新及科技局上拉布，結果，呢啲「政績」搞到泛民議員民望全線插水，最近嘅民調顯示，七個上榜嘅泛民議員冇一個評分合格，真係偷雞唔成蝕揸米，聽講有泛民中人更賴「雙學」唔做嘢。

設計圖片及對白

泛民眼見形勢惡劣，已打定輸數，將創科局「拉布」作為最後一擊，然後將不合作運動收檔，否則年底區會以至明年立會選舉就一鑊熟。不過有泛民成員埋怨，佢哋交足晒功課，賠上民望發起不合作運動，反觀昔日同路人、一眾「雙學」領袖不但多謝都冇句，早前言之鑿鑿話搞「傘落社區」運動，落區宣揚民主，可惜班後生仔每次落區唔係被狙擊，就係被居民圍住鬧，難怪「傘落社區」搞搞吓都無疾而終。

其實，多個「雙學」領袖近日已潛晒水，繼學聯秘書長周永康計劃海外升學，副秘書長岑敖暉又拍拖大過天，連早前揚言會趁政改第二輪諮詢狙擊政改三人組計劃都冇晒影，高官無論高調走勻全港，抑或低調現身派傳單都唔見雙學表達意見。呢次泛民火燒身，雙學不給力，再次反映政改反對派一盤散沙，玩完就撇！

第一手消息請下載on.cc東網iPhone/iPad/Android/Windows Phone Apps