政壇：晶晶未封肚啟剛追羊B

情人節同農曆新年將至，香港青年協會尋日率先大排筵席約二百圍，邀請多名政府高官及香港青年聯會主席霍啟剛等人，同街坊街里預早食團年飯慶祝。問啟剛會否追番個羊B？佢代太太郭晶晶表明仲未「封肚」，隨時準備再追多個喎！佢又笑言，自細都有兩個細佬陪伴，唔想囝囝中曦孤伶伶一個成長，講到咁白，大家明喇。

霍啟剛透露隨時準備再追多個B。

咁情人節有乜安排呢？啟剛話今年情人節會「例牌」陪父親霍震霆食飯慶祝，皆因當日係爸爸生日，年年都係咁過，同太太就要另擇一日補數喇。啟剛又透露，中曦已經一歲半，開始上Playgroup（遊戲小組），但自己就拒當怪獸家長，只係希望囝囝多啲同其他小朋友相處啫。