奪命流感兇夾狠 奈何官僚懶懶閒
「千祈千祈千祈，洗手洗手洗手」，呢句經典說話出自前特首夫人之口。當時香港爆發沙士，特首夫人全副武裝上陣，苦口婆心提醒市民注意個人衞生，雖然滑稽咗啲，但家陣睇番，都幾用心良苦嘅。
呢，香港進入流感高峰期，變種病毒來勢洶洶，短短個零月已奪去近一百二十條人命，淨係前日就有十二人死亡，尋日又增加七人，唔驚就假咯。有議員喺立法會提出緊急質詢，炮轟當局防疫不力，處理流感疫情過分低調，連半心半力都冇，容易令市民低估殺傷力，掉以輕心。
咁又係呀，今次流感嘅死亡率比過去幾年高，專家都話病毒出現「抗原漂移」，感染後出現炎症機會大增，連青壯年都中招；加上高峰期將持續多四至六周，死亡人數隨時高達三、四百人，比當年沙士造成二百九十九人死亡更加可怕。可惜吖，急驚風遇着慢郎中，當局一直漫不經心，除咗例牌叫市民提高警惕、注意衞生及主動求醫，再冇特別防疫措施，同不設防冇乜分別咋。
嗱，有議員提議市民戴口罩，本來不失為一個防疫好方法，點知身為醫生嘅食衞局局長高永文居然不置可否。佢話喎，戴口罩雖然有助減低病毒傳播機會，但目前專家意見紛紜，佢擔心咁做會出現「社交疏離」，對社會帶來負面影響。喂，疫症當前，人命關天，唔通社交仲緊要過市民健康？咪話太一叮踢爆吖，高永文唔係擔心社交疏離，而係擔心全城戴口罩會令人諗起沙士，以及諗起港府失職。
其實，防疫寧緊勿鬆，道理一字咁淺，港產官僚麻痹大意，萬一爆大鑊，佢哋實走唔甩o架。即係咁，今次流感之所以「殺人如麻」，雖然同世衞誤判疫情有關，導致全球買錯疫苗，效力大減，但唔錯都錯咗，當局係咪好應該亡羊補牢，提高防疫級別呀？有乜理由翹埋雙手，淨係叫市民自求多福就算呀？唔通港產官僚見到棺材都唔識流眼淚？
唔係講笑o架，目前公營醫療已經超晒負荷，急症室日日逼爆，病床使用率平均超過百分之一百一十，加上醫護人手不足，萬一流感疫情繼續惡化，後果不堪設想。仲有呀，內地禽流感未有緩和迹象，新春期間兩地交流頻繁，萬一兩疫洗牌變種，隨時重演沙士慘劇都似。正所謂，黃台之瓜，何堪再摘，家陣香港立立亂，再經唔起疫症摧殘嘅喇，叮！
