呢排亞洲電視陷入財困，到依家仲係欠部分員工十二月份糧，但係「舊債未清、新債又起」，嚟緊又要面對一月份出糧，同埋可唔可以續牌。同樣面對冇糧出嘅亞視執行董事葉家寶，尋日就罕有現身立法會，去到五樓「咖啡角」同身兼律師嘅建制派議員Paul謝偉俊「飲杯咖啡」，飲咗成粒幾鐘咁耐，期間我哋就見到佢同事手上嘅文件夾有勞工處圖案，估計係同欠薪傳票有關。

葉家寶（左）到立法會同謝偉俊飲咖啡，攞法律意見。

葉家寶話想請教阿Paul嘅法律意見，又話一直都想搵阿Paul去亞視做法律節目。阿Paul就話亞視依家資源短缺，所以佢係義務提供法律意見嘅，幫手處理「較為急切嘅問題」，至於係乜嘢問題，雖然佢唔肯講，但相信大家都估到喇！

第一手消息請下載on.cc東網iPhone/iPad/Android/Windows Phone Apps