城中鏡：甄韋喬傑青路 清潔可出頭
傑出青年協會日前換屆，富豪酒店集團副主席羅寶文將傑青主席棒交予外號「清潔大王」嘅Mickey甄韋喬。從「倒垃圾」出身發展清潔事業，再走上傑青之路，在於人棄我取。Mickey慨嘆時下青年人只獨沽一味想做律師、醫生、會計師、工程師，看不起「低下工種」，佢認為呢條路機會仲多，只要肯搏肯捱，上位快人一步。
羅寶文（左）卸任傑出青年協會主席，交棒予「清潔大王」甄韋喬（右）。
同樣係傑青嘅維多利亞教育機構總校長孔美琪（左）同沙田區議員龐愛蘭（右）都有嚟捧場。
身為傑青嘅盛滙商舖基金管理創辦人李根興睇好歐美同亞洲物業市場，今年將大舉出擊。
傑青新一屆執委會交接儀式上，除交棒嘅羅寶文外，多位前主席如葉恩明醫生、陳念慈同龐愛蘭等齊撐場。不同年代嘅傑青嚟齊晒，相當熱鬧。今屆主席Mickey出身傳奇，香港大學校務委員會主席「金刀梁」梁智鴻都嚟講聲恭喜，順便開腔分享喺動盪時代下，如何展現領導才能。金刀梁縱橫政壇、醫界多年，夠晒資格講呢個題目。
金刀梁嘆青年自我「唔捱得」
金刀梁直言，部分青年人太自我，往往以「我先係最重要」先行，忽略社會問題。佢又提醒大家，領袖唔易做，要做好「極之透明」、「毫無遮掩」準備，仲要抵得諗，好似沙士肆虐時，佢身為醫管局主席，既要帶隊抗疫，仲要處理局內日常工作。睇番時下青年人，真係好少咁捱得，難怪金刀梁有感而發。
Mickey都話好關心青年人向上流動，上任後將舉辦多場論壇，邀請城中名人同傑青分享成功之路，又打算搞「師友計劃」，讓傑青擔任中學生嘅良師，分享創業、營商同管理心得，啟發青年人新思維。
