SUN揭秘：救牛勇士 掌上明珠

南韓早前一套獨立電影，記錄了一對八旬農夫與老牛的微妙關係與生離死別，感動人心。本港一名愛心男子上月一個深宵，於粉嶺近郊在三頭惡犬的狂吠下，奮不顧身救出一頭命懸一線的初生小牛—小明珠，「我只想盡力救佢，再將佢送返大自然生活」。這個信念令Audi對小明珠呵護備至，小明珠亦與他如影隨形。他倆就此展開了一段「人牛情誼」。

凜凜寒風，Audi帶着小明珠到獸醫診所覆診，卻大汗淋漓。「唔好睇佢咁細隻，都有成四十幾磅重。」獸醫檢查期間，小明珠總依偎在Audi身旁撒嬌，「佢（Audi）其實照顧得小明珠好好，皮膚表面大部分傷口已經康復，但仲有一個傷口發炎，所以要打消炎針。」儘管獸醫指小明珠康復進度良好，但Audi仍難掩憂心，不時關注着醫生注射的位置，似擔憂小明珠是否承受得住痛楚。

原來一切擔憂，皆因小明珠曾經歷過不能承受的痛，「當晚我喺屋企聽到狗吠聲，出嚟見到三隻狗追住小明珠咬，我即刻着鞋同拎住掃把衝出去。」雖然Audi身形魁梧，但過程仍驚險萬分，追至山邊時更仆倒在地，連鞋亦被泥濘黏住，惟有隨手檢起玻璃樽扔向狗群嚇走牠們，「當時我見佢得一隻，估佢同牛群失散，又受傷流血，於是就抱佢返屋企去，幫佢洗傷口。我都係第一次幫牛仔處理傷口，仲要周圍問人可以點做。」Audi慨嘆，由於小明珠受傷，一度想送牠到動物機構，但又怕牠被人道毀滅，十分矛盾，最後決定自行照顧。

「聽到我把聲先肯飲奶」

「其實冇耐之前，已經見過有小牛周身傷痕死喺路邊，我親手葬咗佢。今次見到小明珠，我唔想佢死喺我面前，今次一定要救到。」Audi在網上求助，隨即獲過千網民回應，更有熱心網友翌日晚上與他合力將小明珠安置在「牛牛之家」。

Audi原本打算安心回家，詎料兩天後負責人通知他要自行照顧小明珠，「負責人話小明珠要聽到我把聲先肯飲奶，我當日就買埋尿片、暖貼，仲同佢（小明珠）一齊瞓咗一晚，感覺到佢好辛苦。」由於「牛牛之家」人手不足，最後Audi只好接牠回家，再帶牠到獸醫求診，「好彩有朋友介紹去獸醫診所，小明珠傷勢先有好轉。」

因為小明珠，Audi的生活也變得不一樣。由於每隔四小時就要餵小明珠飲奶，午後要帶牠到附近的草原吃草、散步，他索性辭去工作，又在廚房打地鋪，方便伴牠左右。「照顧小明珠過程確係好辛苦，但當日決定咗要照顧佢，就要繼續堅持落去。」Audi縱然一臉倦容，惟提及小明珠的百厭事，卻顯得格外精神。

經過近一個月的療養，小明珠現時已大致康復，惟不少網民仍批評他的做法只會令小明珠將來難適應大自然環境，「我從冇當過佢係寵物，亦都想過帶佢返牛群生活，但我一行開佢就追住我，依家我只希望佢完全康復，有自理能力時，再帶佢返大自然生活。」

至於小明珠名字，原來並非Audi所改。「當日我係夜晚送佢到『牛牛之家』，負責人就幫佢改咗小明珠呢個名。」牠的名字，猶如這個寒冬，明珠照亮黑夜，燃起這座城市遺忘已久的淳樸情誼。