政壇：佳節前後喜慶多鍾國斌唔開財會

政府最近接連提出加開多節立法會財委會會議，審議創新科技局撥款，最新建議於下周六、即二月十四日情人節當日再加開兩節會議，正等待議員回覆是否支持。但至少兩名建制派議員提早預告當日唔會出現，包括紡織及製衣界議員Felix鍾國斌，仲打算於情人節前離港。

Felix鍾國斌

Felix透露，情人節當日未能出席會議有原因，事關佢同太太於情人節前兩日，即下周四（十二日）係結婚二十三周年紀念，下周五（十三日）則係太太生日，連同情人節在內，會預備一系列慶祝活動，但佢依家未決定去邊個地方，打算撲到機票飛邊度就邊度。

其實，政府有意再加會審議創科局前，工聯會議員陳婉嫻率先表態唔得閒，因為佢於下周六有街坊活動要參加，直言如果係通過唔到相關撥款，剩係坐喺度都冇意思，希望各方傾好先搵佢喎。