變種H3N2流感肆虐全港，短短個幾月已有百幾人中招死亡，有人更伺機危言聳聽，瘋傳疫情直逼「沙士」，嚇得人人自危，難怪食物及衞生局局長高永文成為眾矢之的，被立法會議員鬧爆佢低估疫情。不過，高永文耍絕招苦情伸冤，稱上月十七日至今，已見足傳媒十七次，每次都好肉緊咁呼籲市民注意個人衞生。咁講法，佢下屬衞生防護中心總監梁挺雄同衞生署署長陳漢儀去咗邊？

（設計圖片及對白）

立會尋日特別安排緊急質詢討論疫情，本身係醫生嘅郭家麒指出，公共衞生出現咁大威脅，高永文、陳漢儀、梁挺雄同醫管局行政總裁梁栢賢四大巨頭責無旁貸。不過，除咗高永文，其餘幾個主理公共衞生嘅高官都長期隱形，高永文難免被人感覺孤軍作戰，更令人懷念梁挺雄嘅上手、中心前總監曾浩輝當年有問必答嘅年代。據知梁挺雄經高永文溫馨提示下，先即日撲出嚟開記招，交代疫情。

阿涂呻囝囝入院排長龍

隱形官員被逐個抽秤，議員亦乘機向高永文申訴兼要求斷症，涂謹申話三歲囝囝早前發高燒，漏夜入公立醫院睇急症，點知經分流後，要排成五個半鐘先有醫生睇，惟有轉睇私院云云。阿涂似乎唔知民間疾苦，發燒感冒凌晨入公院，閒閒哋都等到天光啦，難怪高永文撐公院急症室嘅前線分流指引合適喇！

前日已聲都沙晒嘅「大舊」陳偉業尋日繼續戴口罩上陣，但同場嘅譚耀宗隨即申報自己係六十五歲以上嘅高危人士，向高永文告狀稱大舊前日出席財委會特別會議，已講講吓嘢除口罩，問高永文係咪應該呼籲病人離開會議廳。高永文似乎冇咁好氣娛賓，只話係咪返工應該睇咗醫生先囉！

第一手消息請下載on.cc東網iPhone/iPad/Android/Windows Phone Apps