政壇：唐翔千自傳爆分產安排
唔少億萬富豪經常爆出子女爭家產新聞，但相信呢啲新聞未必會出現喺前政務司司長唐英年父親唐翔千家族。點解？唐翔千最近推出自傳，自爆有一套財產分配安排，佢話唔希望為子女留下太多財產，但所有唐氏家族子孫，無論讀幼稚園定大學，外國定國內升學，所有學費都由家族包起。此外，每名子孫都可以喺全球任何一個地方購買一套實用型住宅，但至於後人食粥食飯就要靠自己喇！
六十年代唐翔千家庭嘅合照，後排左二為唐翔千，後排左一為唐英年。（《唐翔千傳》）
唐翔千喺自傳中講到明，連家族企業都唔建議全盤交畀子女，最多讓屋企人喺董事會擔任董事長要職，咁就可以避免有後代不善經商，最終敗晒成副唐家資產。佢做得出呢個安排，充分反映佢有「富不及三代」嘅憂慮，所以一早做定兩手準備。
書中又提到唐英年喺前年特首選舉落敗後，夜晚打電話返屋企同爸爸傾偈，唐翔千聽到唐唐把聲有「些許沮喪」，惟有勉勵唐唐一句說話：「英年，好好睡一覺，爸爸知道你好辛苦。」並寄語佢做唔成特首，都要為港人謀福祉。
