喺上月成立嘅香港青少年軍總會，引起社會關注，更被泛民主派質疑青少年軍嘅成立，係為咗幫香港青少年「洗腦」。不過，立法會金融服務界議員張華峰就對青少年軍好有興趣，仲特別喺立法會問民政事務局局長曾德成「入會」資格添！唔通佢想加入青少年軍總會？張華峰就話其實係想二百磅嘅囝囝加入，等囝囝鍛煉下咁話。不過，佢囝囝已經三張幾嘢，唔知會唔會超齡呢？

（設計圖片及對白）

盼200磅子鍛煉增自信

教育界議員葉建源尋日就青少年軍事宜向當局提出質詢，當泛民個個發言質疑青少年軍嘅成立係咪為咗幫後生仔「洗腦」、解放軍駐港部隊協助訓練有冇違反《基本法》時，張華峰就企起身話，睇唔到解放軍培訓青少年軍係違反《基本法》，仲問德成局長青少年軍幾時開始招募、有乜嘢條件、有冇體重限制。

當身形一向都好有分量嘅張華峰問完有冇體重限制，在座嘅議員即刻爆笑，會議廳真係好耐冇咁歡樂喇！

不過，德成局長就似乎畀佢呢個突如其來嘅問題難倒，口窒窒咁話，佢作為青少年軍嘅榮譽顧問，都係青少年軍需要時先畀意見，至於總會向乜嘢人招募、有乜嘢限制，都要問番青少年軍負責人喎。

張華峰咁關注青少年軍有冇體重限制，莫非佢有意加入？佢就話係想叫囝囝加入，因為囝囝同佢都屬「重量級」，有成二百磅，所以都想囝囝參加，鍛煉下身體之餘，相信都可以增加自信心。

不過，咪以為叫囝囝就係細路，實情佢囝囝已經喺加拿大讀完書，仲返香港做咗幾年嘢，已經三十幾歲喇，唔會超齡咩？張華峰就話呢個年代，六十歲先至係中年，三十歲算係青年咋！

第一手消息請下載on.cc東網iPhone/iPad/Android/Windows Phone Apps