官媒教路掃年貨 最怕矛盾又惡化
「年，又過年，共慶歡樂綿綿。」歌係咁唱啦，但家陣未過年已經七國咁亂，共慶歡樂唔係咁易嘅咋。點解咁講？大家有眼見，內地同胞前赴後繼湧來香港辦年貨，搞到北區好似淪陷咁，中港矛盾唔火上加油都幾難。
風水輪流轉，以前係港人北上辦年貨，家陣係內地同胞南下掃年貨。呢，上周日之嘛，短短三小時就有二萬名內地旅客經羅湖口岸湧入本港，都咪話唔誇張。即係咁，內地旅客來港消費，帶旺經濟，當然無任歡迎，之但係，香港始終係彈丸之地，人滿為患嘅滋味，唔止唔多好受，而且隨時引發衝突添。
好似北區咁，因為長期被水貨客攻陷，居民日常生活大受影響，有人喺網上發起反北區水貨客行動，仲圖文並茂教人放火燒倉。結果真係有人響應，警方日前啱啱拉咗三名涉嫌企圖縱火嘅青年，點知數小時後，上水又有水貨店舖懷疑被人縱火，問你怕未。
點都好喇，激進行為絕對不能鼓勵，犯法行為絕對不能姑息，今次冇搞出人命係好彩咋。不過咁，內地客蜂擁而至，認真唔講得笑，居民連搭巴士都困難，小商戶又因為水貨客阻街而做唔到生意，簡直有苦自己知。更弊嘅係，內地官媒唔知係咪嫌中港矛盾唔夠激烈，竟然推出香港辦年貨指南，教內地客去上水及上環掃貨，真係唔知好嬲定好笑。
其實，中港矛盾之所以不斷惡化，最大原因係水貨活動愈演愈烈，而歸根究柢係國產官僚不作為，既冇做好食品監管，亦冇嚴打假貨劣貨。官媒係咪應該負起監督之責，要求當局加強監管，杜絕黑心奸商危害同胞呢？家陣冇做好份工不特止，仲教人來港掃貨，簡直本末倒置，添煩添亂。
咁講啦，有頭髮冇人想做瘌痢，內地同胞都唔想被人視為「蝗蟲」嘅，問題係中國製造靠唔住，食品隨時食死人，淨係奶粉咋，一時食到成為大頭娃娃，一時又飲到成為結石寶寶，係人都怕怕。所以話，內地食安問題一日唔解決，香港水貨問題又點會唔嚴重吖？中港同胞又點會唔水溝油吖？
話時話，港府成日話要喺邊境搞購物城疏導旅客，十畫終於有一撇嘞，聽聞當局已經選址落馬洲一幅土地喎。嗱，講多無謂，行動最實際，唔該港產官僚加多兩錢肉緊，快快趣趣搞掂佢，唔好再任由中港矛盾繼續惡化喇，叮！
