城中鏡：萬科王石想搵機械人幫手
房地產行業發展一日千里，內地龍頭房企萬科近來增加海外投資，主席王石近日就話，除咗房地產之外，萬科未來嘅投資目標仲有機械人，因為佢哋睇準中國人口老化加劇，年輕人又未必願意做基層勞動力工作，認為機械人喺物業管理方面有好大嘅發展空間喎！
王石透露，集團將投資發展機械人，佢估計機械人可以承擔起保安、清潔等工作。（資料圖片）
王石出席公開論壇時話，城市配套相關嘅行業好重要，如保安、清潔、老人社區服務等工作，可惜新一代唔願意再做勞力工種，加上人力成本非常之高，機械人就正好幫手做，所以佢相信機械人會好快普及。咁係咪未來萬科興建嘅屋苑門口，甚至屋苑會所周圍，有一日會見到機械人喺度執勤呢？譬如看更，甚至有機械清潔工、機械園丁、機械「sales」呢？
