城中鏡：漢鍾離上身 趙樓神「成仙」
羊年將至，市面已經一片喜氣洋洋，長實尋日舉行一年一度新盤巡禮推介活動，今年主題係「八仙過海 各顯神通」，有樓神之稱嘅集團執行董事趙國雄再次百變登場，佢率領一眾營業部高層粉墨登場，以唐裝衫配合Q版「八仙」紙牌造型出場，真係好盞鬼。
趙樓神再次扮嘢登場，客串八仙過海中嘅漢鍾離。
盼撥走社會陰霾
有心思嘅係，每位高層「八仙」上身登場時，都會手持法寶，帶出自己負責嘅樓盤特色，其中趙樓神就手持漢鍾離嘅芭蕉扇，佢仲貫徹一貫鬼馬本色，笑言希望用把扇為各位揸盤人打氣之餘，仲想將社會上唔開心氣氛掃走咁話，大會又送贈八仙果，安排襯晒主題，又好貼心。為咗呢個活動，現場一度大放乾冰，營造仙境一般嘅感覺，真係娛樂性豐富，夠晒吸引力。
