城中鏡：港產品牌跳出框框
由中華廠商聯合會（廠商會）牽頭成立嘅香港品牌發展局（品牌局）唔經唔覺踏入十周年，前日舉行頒獎禮表揚港產傑出品牌。事實上，唔少港產名牌早已衝出海外，有時裝品牌進駐中東國家開店、有旅行社老闆就親自帶團遊歷伊朗，即使係傳統餅店亦搞搞新意思開拓客源，絕對唔會故步自封。
黃進達（右）透露爸爸將帶團遊伊朗，旁邊羅穎怡就話中東婦女私底下都可以着得好潮。
陳淑玲（左）抱恙上陣，握手接棒嘅黃家和就操弗身體抗病魔。
黃嘉信（左）執掌嘅奇華餅家獲卓越名牌，廠商會會董羅永邦都戥佢開心。
品牌局今年仲特別頒發「名牌十年成就獎」，其中以「服務名牌」獲獎嘅康泰旅行社，就由董事總經理黃進達（Jason）代表領獎。Jason坦言，要守住父業唔容易，好似爸爸黃士心即使年過六十，嚟緊農曆新年仍親自帶團去伊朗。中東國家戰亂頻繁，Jason話只要避開敍利亞、伊拉克等地就冇問題，況且爸爸做足功課先決定帶團，絕對放心！
羅穎怡解構伊斯蘭潮服
衝出亞洲嘅仲有時裝品牌堡獅龍（Bossini），代表領獎嘅羅氏針織後人羅穎怡（Wendy）話，該品牌進駐中東多年，杜拜、阿聯酋首都阿布扎比都有其蹤影。伊斯蘭婦女嘅服飾因要跟隨教義而較香港保守，Wendy解釋，佢哋罩袍下其實都着得好潮，品牌唔使改變設計都可以直接銷售，但潮服只有閨中密友、家人先有幸欣賞喇。
至於獲頒「卓越名牌」嘅奇華餅家，其品牌第三代後人兼執董黃嘉信（Karlson）就話，唔進駐中東，都可以喺傳統食品上諗花招，絕對唔老套。另外，卸任在即嘅品牌局主席陳淑玲當晚抱恙上陣，原來佢赴天津開會後返港即中招，感冒都要頂硬上，但候任主席黃家和（Simon）去年大病一場後每日晨運當鍛煉，尋晚就相當生猛喇！
