政壇：搞搞政：立會地區議席增減建制兩陣營爭崩頭
選舉好似冇硝煙嘅戰場，明年立法會選舉，由於區域人口增長出現變化，港島區將會由七席減至六席，而九龍西就由五席加到六席。呢一變，勢令好多政黨要大變陣，建制兩大陣營工聯會（工記）同民建聯（建仔）更分分鐘傾唔掂數，重演互相廝殺「鎅票」都有可能。由於港島少一席，上屆得票最少嘅王國興就危喇，真正係隨時斷纜，唔知邊度踎噃。
設計圖片及對白
傳郭偉強頂替王國興
不過，有傳聞話，工記都有變陣打算，如派勞工界議員郭偉強轉攻港島區直選頂替王國興，若果傳聞屬實，睇怕郭偉強嘅選情就真係凍過水。不過，郭偉強仲有一線生機，因為港島區議席萎縮，建制派有可能僅得三席，到時建仔係咪仲大條道理霸住兩個議席呢？至於九龍西方面，一二年選舉，工記本來派出周聯僑出戰九龍西直選，但後來顧全大局下被勸退，結果成就建仔蔣麗芸做票后。事隔幾年，蔣麗芸氣勢如虹，得票分分鐘高過上屆有凸，到時建仔會否乘機搶攻兩席，抑或乖乖哋將新增議席拱手讓予工記，睇嚟仲係要傾過至得。
不過，九西增一席，原本嘅地頭蟲民協來屆好可能變陣，如派出廖成利，咁議會之爭仲有大把戲睇。
