政壇：「D7」戰後兩冤家保持距離

立法會內泛民與建制派議員關係好惡劣，當中又要數最新嘅冤家黃定光同范國威，佢哋兩個因為早前嘅剪指甲一役，搞到公然反面，爆出大鬧「D7」嘅醜事，不過，鬧還鬧，工作還是要繼續，尋日又見兩人一齊活動。

黃定光（前左一）與范國威（後右二）在行程中始終保持一定距離。

同出席交委會活動

話說立法會交通事務委員會尋日有個視察活動，參加者下晝喺東涌搭船出海，期間有政府官員介紹工程進度，呢個活動雖然係交通事務委員會嘅，但非委員成員嘅黃定光都有現身，而本身係委員嘅范國威又當然成行，結果兩個人就喺小小嘅船艙中，一再出現這麼近、那麼遠嘅趣鏡。

雖然話個船艙大得去邊呢，但有眼利嘅人都發現，黃定光同范國威兩人似乎好默契咁保持距離，呢個企左，嗰個就企右，一個坐前，另一個咪企後囉。