政壇：再掌最低工資會翟少做磨心
新一屆最低工資委員會（下稱委員會）成員任命尋日公布，全部委員「冧莊」，包括做咗兩屆主席嘅資深大律師翟紹唐（翟少）。不過，連埋翟少在內，有六個成員已經連續做咗兩屆，到咗擔任公職人員六年任期嘅上限，即係話，下屆肯定超過一半成員要換人。翟少坐多兩年並無意外，不過，喺勞方嗌唔夠使、資方嗌開支大嘅情勢中做夾心人，真係唔易坐o架！
設計圖片及對白
委員會成員名單中，十二位成員同主席全部照舊，新任期由下月一日開始生效。睇番張名單，有六個人已經連續做咗兩屆，包括翟少、陳章明、劉千石、劉嘉時、孫永泉同黃傑龍，按例下屆唔可以再「冧莊」，咁即係話到時大把新人上莊囉。
來屆新莊恐坎坷
講番最低工資委員會嘅工作，佢哋每次傾最低工資水平時都係爭拗多多，尤其是勞資雙方各持己見，各不相讓。好似舊年咁，大家為咗五毫子鬧到面紅耳熱，氣氛異常緊張，好彩最後有壓得住場嘅主席翟少出手，協調勞資雙方，大家最後先至達成共識，同意將最低工資水平由依家三十元，加到三十二個半。但係下一屆翟少都要揮揮手講拜拜，新委員可唔可以盡快度過磨合期，接手下一次最低工資嘅審議工作就唔知嘞。
冧莊委員黃傑龍尋日話，多謝政府繼續委任佢，但就完全唔擔心再下一屆會因為「新人」太多而傾唔掂數。佢解釋，傾最低工資水平唔係「打網球比賽」，唔使睇對手，大家都係憑數據講說話，所以邊個做都差唔多。佢又話，嚟緊新一屆全部係「舊相識」，連磨合時間都慳番，工作效率應該會更加好喎。
