空談融合教育 靠害特殊學生
如果問大家乜嘢係「融合教育」，相信好多人都會擘大口得個窿。又難怪嘅，呢項教育「德政」雖然已經實施十六年，但連學生哥自己都十問九不知，何況一般市民吖。至於特殊學生未曾「共融」反受欺凌，同樣冇乜人知，就更加係「正常」過正常喇！
係咁嘅，關注團體調查發現，九成受訪同學對融合教育一無所知，當中一成甚至認為特殊學生係學校嘅負累同障礙；對特殊學生同共融理念嚴重缺乏認識嘅一般學生亦有七成。更加得人驚嘅係，三成特殊學生表示，曾經喺校內受到唔同形式欺凌，但係七成學生見到欺凌事件選擇袖手旁觀。
所以話啫，呢班同學仔本身係需要特殊照顧o架嘞，家陣日日返學反而要擔驚受怕，點可能適應主流校園生活，畀心機讀書吖。調查發現兩成受訪特殊學生話寧願唔返學，有乜出奇吖。
諗落真係諷刺，融合教育原意就係讓特殊學生進入主流學校，同其他同學接受一樣嘅教育，幫佢哋更早融入社會，點知教育官僚講就天下無敵，做就有心無力，話就話「共融社會，由學校做起」，其實根本冇心幫呢班同學，求其將佢哋踢畀主流學校後就關人個關，結果製造更多矛盾甚至釀成悲劇添。
正所謂，巧婦難為無米之炊，融合教育唔可以齋靠把口噏o架。配合視障、聽障及其他特殊學生需要嘅設施，受過專門培訓嘅教師等等固然唔少得，其他同學同家長對融合教育嘅認知，同樣唔可以忽視。可惜吖，咁多年嚟當局要資源冇資源，要宣傳冇宣傳，唔撞板至奇喇。
嗱，淨係講師資吖，本港公立中、小學教師裏面，分別只有大約一成及兩成七曾經接受有關特殊學習困難嘅基本培訓。至於學校支援更加有等於無，連特殊學生支援主任都只係兼職，推動融合教育純粹為咗交差，點可能有成效o架。好似自閉症學生咁，佢哋缺乏日常生活社交技巧，情緒管理方面亦比較差，好多老師就係因為缺乏基礎訓練，以為自閉症同學只不過係調皮搗蛋，加以懲罰，結果只能適得其反。
一句到尾，融合教育弄巧反拙，有教無類淪為誤人子弟，完全係因為港產官僚漠視現實，結果搞到共融不成反靠害。計太一叮話齋，最需要融合教育嘅，係班人頭豬腦的教育廢官。叮！
