城中鏡：曾咏出書教韓風美顏
擁有港大微生物系碩士嘅模特兒Winnie曾咏，舊年出書教人講營養，又到大學教皮膚衰老基因，更拍短片以實驗室方法測試化妝品同護膚品，恍如女版曾近榮咁。最近佢忙於為新書進行資料搜集，計劃喺書展期間推出韓國美容書，今次已經係佢第三度出書嘞！
曾咏嘅媽咪係中醫，有好多養生湯水同秘方可以同大家分享。
喺韓國旅遊期間，曾咏品嘗咗好多美食。
問到今次點解會以韓國美容為主題？佢解釋：「因為近年韓風好勁，而且我身邊有唔少韓國人朋友，有次去韓國旅行，一個韓國朋友帶咗我去韓國護膚中心，連金秀賢都係去嗰間做o架，我試做咗個水光療程，做完塊面好似拋咗光咁，真係好透好令，我覺得幾得意，香港又無呢類療程，所以決定出本書講韓國護膚之旅，仲會推介當地又平又正嘅護膚用品，再加埋飲食同玩樂資訊，出一本好實用嘅旅遊手冊。」
除咗出書之外，Winnie又會再到大學同大型機構主持講座，以養生同護膚為主題，佢話：「我媽咪係中醫師，佢都有好多養生湯水同秘方，我都想睇吓有乜嘢方法可以將呢啲實用資訊同大家分享。」
