城中鏡：反貪食得清淡 陳智思讚好
近年內地雷厲風行打貪，連行政會議成員Bernard陳智思都受惠？話說Bernard早前獲邀出任中國國電集團公司董事，主要睇中佢有香港企業管理經驗。佢自言由於內地打貪，開會後會喺該企業飯堂食工作餐，啱晒佢可以食得清淡嘅口味，好似食過粗糧，而煨番薯亦好好味，加上佢唔熱衷杯中物，日後唔使再諗藉口推卻別人飲酒邀請。
陳智思（右）出席首屆超級馬拉松賽事，落場跑番六公里。（受訪者提供圖片）
佢又話內地方面全面檢視國企管理，形容依家國企開會猶如三月北京「兩會」嘅翻版，有好多工作會議同事前調研工作，估計每年要到北京等地多次。
此外，Bernard最近亦獲邀請出任香港超級馬拉松協會榮譽會長，上月底更於科學園舉行首屆超級馬拉松賽事，佢都有落場跑番六公里，又笑言如果再跑長啲路程就唔好，皆因之前曾整親膝頭喎。
