政壇：搞搞政：陳家強耍太極避勞工界狙擊
商界同勞工界過去多年多次就調高最低工資同男士侍產假議題短兵相接，據聞勞工界今年將取消強積金對沖機制列為首要爭取目標，誓要爭取當局立法逐步降低強積金對沖比例，或者索性取消整個對沖機制。勞聯議員「潘少」潘兆平解釋，勞工界致力爭取取消強積金對沖機制，旨在令打工仔唔會因被僱主遣散，辛辛苦苦儲咗多年嘅強積金化為烏有。
設計圖片及對白
咬住強積金對沖唔放
不過眾所周知，商會代表極力反對取消強積金對沖機制，無非擔心建議會增加中小企財政負擔，有人建議當局應該先改良強積金制度，解決管理費蠶食強積金嘅問題後才考慮下一步工作。
據悉有勞工界中人分析，與其同商界代表打「口水戰」，不如破天荒邀請財經事務及庫務局局長陳家強出席下月二十三號舉行嘅新春酒會，當面向陳家強表達取消強積金對沖機制嘅訴求。雖然勞工界出師有名亦有誠意，但據聞陳家強近日以公務繁忙為由婉拒出席，勢必令勞工界大失所望。
另一方面，陳家強尋日出席立法會財經事務委員會，亦多次畀勞工界追問佢幾時先肯取消強積金對沖機制，批評政府有意於此事「走數」，佢回應話強積金對沖議題存在極大爭議，加上要平衡勞工界同商界利益，強調雙方於有關議題仍未取得共識，當局會繼續聆聽社會人士嘅意見。
由此觀之，勞工界想於短時間就取消強積金對沖機制取得突破，似乎係難過登天，或者要有心理準備同商界打一場持久戰。
