政壇：馬化騰雷軍膺網企好老闆
好多人都話內地網企好有米，例如百度同騰訊豪派五十個月薪水花紅。花紅多雖然都唔代表公司係好老闆，但花紅少就好難講得上係最佳僱主啦。內地互聯網行業近日就搞咗個「年度最佳網企僱主」評選，馬化騰揸fit嘅騰訊、京東同小米都榜上有名，但唔見咗阿里巴巴同百度。
馬化騰同雷軍喺「年度最佳網企僱主」評選中，榜上有名。（資料圖片）
雷軍。（資料圖片）
要知道近期網上傳到沸沸揚揚，就係網企鬥豪派花紅，搞到好似玩Show Hand咁，除咗騰訊同百度外，小米雷軍亦許諾，若舊年小米出機超過六千萬部，每名員工可獲贈一部小米4同小米板腦，連蘋果公司都唔捨得送iPhone畀旗下員工喎，而網傳阿里巴巴更豪派一百個月花紅，令大家興奮莫名好一陣子，但其實呢個訊息係誤傳，阿里要本周先會宣布花紅數目。
好老闆有乜評價準則？據主辦機構招聘網站「拉勾網」話，要獲選為「最佳老闆」，除咗要靠卓越人才戰略，造就高效、專業而激情洋溢嘅隊伍，還要做到尊重每一個人嘅價值和創意，把企業建造成價值、情感同利益兼備嘅共同體，咦！好似無提到人工嘅因素。
