IT界靚女邁耶（Marissa Mayer）四十歲之前已成為知名科網公司雅虎嘅CEO，到底箇中有啲乜嘢訣竅？Nicholas Carlson喺佢嘅新書度，借用咗Marissa嘅經歷嚟教大家點樣喺四十歲前賺五億美元。

邁耶（Marissa Mayer）

其中，Nicholas提出咗五項大家可以學習嘅要點，一齊嚟參考吓其中兩個重點喇！第一，「機會難逢要抓緊」，Marissa畢業之後面對着幾個選擇，佢可以選擇安穩咁做個教授，又可以做個好高人工嘅顧問，但佢最終竟然冒險加入咗一間蝕緊本嘅初創公司打工，而呢間小公司就係今時今日嘅互聯網傳奇──谷歌喇！睇嚟做人真係要冒吓險先會有運行。

第二，「識時務者為俊傑」，Marissa當初一早就收到做雅虎CEO嘅邀約，但係佢就睇準時機，到雅虎換咗一班可信性較高嘅管理層之後先再加入，結果依家咪成為咗有權有勢嘅女強人囉。其他次要嘅有「自知之明」、「解決問題」同「不怕得罪人」都是Marissa性格特色。

不過，你估真係天書咩。要做到佢咁成功，一定要有一技之長，如果唔係，呢個世界咪好多人好似Marissa咁，年紀輕輕就賺到五億美元？

第一手消息請下載on.cc東網iPhone/iPad/Android/Windows Phone Apps