政壇：港大學生公投退聯
早前有香港大學學生成立退出學聯關注組，質疑由各大學學生會代表組成嘅學聯黑箱作業，促港大學生會退出學聯。港大學生會下周展開「退聯」公投，同時仲會選出新一屆學生會內閣。兩個候選內閣均主張學生會留喺學聯，但尊重學生啟動公投嘅權利，若果公投結果決定留喺學聯，將要求學聯提高運作嘅透明度。
梁麗幗亦有出席中央諮詢大會。
港大學生會尋日展開中央諮詢大會，吸引逾百學生出席。
港大學生會將喺下周一（九日）起，一連五日周年大選選出新一屆學生會中央幹事會內閣、學生會官方刊物《學苑》編輯委員會同評議員，並公投應否退出學聯。學生會尋日展開為期四日嘅中央諮詢大會，首日吸引逾百學生出席，包括港大學生會主席兼學聯常委梁麗幗。
退出學聯關注組發起人吳偉嘉喺諮詢會上質詢兩個候選內閣「退聯」公投同日後學生會去向。兩候選內閣均主張留喺學聯，指學聯作為八間大專院校嘅合作平台，有其存在意義，而喺對抗極權時應團結一致。有候選內閣話，倘公投結果係「退聯」，日後會多諮詢學生意見，及與唔同政治光譜嘅團體合作；若果係「當聯」，希望能審視港大代表團嘅工作同要求學聯提高透明度。港大學生會喺○六年曾因學聯財政同行政混亂而啟動「退聯」公投，但因投票人數不足而以失敗告終。
