控煙執法得個樣 無煙城市大隻講
古人教落︰世不患無法，而患無必行之法，真係一啲都冇講錯o架。好似禁煙條例咁吖，實施至今多年，煙民人數冇乜減少不特止，反而仲愈來愈年輕化。鬼咩，控煙辦做嘢求求其其，禁煙區形同虛設，香港想成為無煙城市喎，發夢都冇咁早喇！
呢嗱，港鐵旺角東站C出口原本係禁煙區，周圍亦貼滿嚴禁吸煙嘅告示，但煙民們一於少理，旁若無人吞雲吐霧，途人被迫食二手煙。本報記者去現場睇過，一出閘就有成陣煙味撲鼻而來，逗留唔夠十分鐘，已經見到超過十個人公然喺禁煙橫額前大吸特吸，旁邊嘅垃圾桶更加淪為煙民「打邊爐」勝地，問你點頂。
最離譜嘅係，當時明明有食環署職員在場，但佢哋居然化身「紙板警察」，蹺埋雙手扮睇唔到，爭在未自己食埋一份，咁搞法，煙民有乜法子唔有恃無恐吖。
禁煙區淪為吸煙區，點解控煙辦唔執法呢？係咁嘅，控煙辦成日藉口唔夠人手，舊年僅巡查五十幾次，係咁意檢控九十人就當交咗差，跟手大玩卸膊，授權食環署、康文署同房屋署協助執法，結果三個和尚冇水飲，多人管即冇人管，個個部門你推我讓，你賴我賴，問題咪愈演愈烈囉。
計太一叮話齋，控煙辦冇人做嘢係假，冇心做嘢就真。大家有眼見，吸煙愈控愈失控，旺角東站只係冰山一角咋。今時今日好多酒樓食肆、娛樂場所，禁煙令根本有等於冇。冇計喇，控煙辦次次都要等到市民舉報先出動，趕到現場，乜人都散晒水啦。佢哋最誇張嗰次係收到料後三日至做嘢，賊過興兵咯喎，梗係乜都做唔到喇。話時話，控煙辦向來不務正業，最叻係捕風捉影滋擾無辜，甚至充當打壓傳媒嘅急先鋒，如果佢哋肯花一半時間精力嚟做正經嘢，就唔使搞成咁啦！
講番港府控煙，其實真係好鬼虛偽o架，一面叫市民戒煙，另一面淨係識大手加煙稅，打擊私煙就放軟手腳，每年唔見三十億稅款都仲係其次，變相鼓勵私煙販知法犯法，危害市民健康先至大鑊吖嘛。香港烏煙瘴氣，肺癌致死個案不斷上升，控煙辦咪就係罪魁禍首之一囉。
講多無謂，食多會滯。如果港府真心為市民健康着想，打造無煙城市，一係加強執法，一係索性全面禁售，否則嘅話，盞攞嚟搞嘅咋，叮！
