城中鏡：「龍」遊首爾遇精靈長者
近年嚟韓風襲港，而首爾亦頻頻出招搶旅客，竟然出動精靈長者迎賓。叙福樓集團執董Simon黃傑龍早排去咗首爾公幹數日，同飲食集團傾合作大計，期間某日想由明洞搭車去江南區，正當佢哋猶豫緊點樣搭車時，一位着制服嘅伯伯主動上前打招呼，用簡單英文問佢哋想去邊，然後三扒兩撥幫佢哋買飛，反應相當快，細心一睇更發現車站內仲有幾位老人家，原來佢哋係訓練有素嘅服務大使。
黃傑龍（右）喺首爾地鐵站，遇上精靈長者教佢點樣搭車。（受訪者提供圖片）
善用人才 籲港借鑑
據聞韓國早前搞過多次國際性活動，包括亞運、世界盃等，精靈長者都有出動迎賓，而且學得一口流利英文同普通話，眼見當地咁識用人，Simon都話好值得香港借鑑，因為唔少香港長者依然好精靈，如果善用佢哋教旅客搭車，順便講吓香港掌故，比起一味派米派錢畀長者，更加有意義喎。
