城中鏡：英偉父子飲嘢表情餅印一樣
民政事務局政治助理Caspar徐英偉趁周日享受家庭樂，帶兩個囝囝去美荷樓參觀，仲喺美荷樓內一間懷舊冰室緬懷一番，之後喺社交網站上載幾張溫馨家庭照，當中有一張係佢同囝囝一齊喺度飲嘢，其中佢飲緊咖啡，囝囝則係飲緊水，而佢哋兩父子飲嘢個表情完全一樣，十足十兩個餅印；至於另一張相就係Caspar揸住部手機同細仔自拍，當時細仔眼仔睩睩咁望住鏡頭，非常趣致。
徐英偉同囝囝飲水個樣完全一樣，十足十兩個餅印。（互聯網圖片）
（互聯網圖片）
（互聯網圖片）
參觀美荷樓懷舊
Caspar話自己帶兩個囝囝去美荷樓參觀，係想佢哋了解香港歷史同低下階層昔日嘅居住同生活情況，加上佢屋企就近石硤尾，於是就去該處參觀喎。不過家庭樂只係維持一段短時間，事關Caspar下晝就去咗深水埗區敬老送暖大行動閉幕禮撐場，都咪話唔辛苦。
