城中鏡：有發現：為保八米厘攝錄機 何君堯九寨溝炒車

身為主人家嘅健靈慈善基金創辦人陳曦齡就自言以前較少踩單車，但近日喺大埔工業邨新增咗個廠房，話日後會不時喺附近踩吓喎。

林貝聿嘉現身打氣

講起多年來最難忘嘅單車經歷，Junius憶述九六年時任仁愛堂主席時，同一班董事局成員去九寨溝踩單車，當時佢右手揸住一部「八米厘」攝錄機，左手單手控制單車，但左手始終冇咁靈活，加上佢只係顧住將部攝錄機攬到實一實，最後部機冇事，自己則因失去平衡受傷。

今次單車馬拉松亦有二人為一組嘅名人邀請賽，灣仔體育總會主席林貝聿嘉都有過嚟觀戰，為仁濟醫院總理湯振玲、灣仔區議員伍婉婷等參加者打氣，不過一個圈對佢哋似乎唔夠喉，而帝盛酒店太子女邱詠筠則為新增嘅兒童滑步車賽事鳴笛起步，見到一班小朋友玩得咁開心，佢都忍唔住會心微笑。

食物及衞生局局長高永文則夥拍毅歷協會名譽會長Derek高誌樫一齊參賽。Derek少年時代因意外截肢，但熱愛單車嘅佢冇放棄，仲將單車改裝到適合自己使用為止，雖然佢可以踩得好快，但呢日專程遷就自言踩單車好水皮嘅高永文，等埋對方一齊衝線，充分體現合作精神。