政壇：團體演街劇促推全民退保

社會有好大嘅聲音要求政府推行全民退休保障，但政府指社會未就全民退保達到共識，而新一份施政報告只係話預留五百億元搞退休保障，但就搣甩咗「全民」兩個字。逾三十名爭取全民退休保障聯會成員尋日就去到禮賓府請願，促請政府盡快落實全民性、無審查嘅退休保障制度。

逾三十名爭取全民退休保障聯會成員到禮賓府請願，促請落實全民退保。

請願人士更即場上演街頭劇諷刺政府喺退保議題議而不決，又指施政報告嘅五百億元撥款係用嚟否決全民退保嘅掩口費添！聯會又即場模擬公投，批評政府以公眾諮詢為推搪，令落實全民退保一拖再拖，促請政府以公投形式表決退休保障是全民受惠，抑或只給予有需要人士。

爭取全民退休保障聯會發言人楊女士話，六十五歲以上長者曾貢獻社會，理應喺退休後得到保障，令佢哋唔使為生活感到徬徨，反對實行資產審查，質疑係「搞分化」，亦令長者失尊嚴。聯會期望每名六十五歲以上長者可每月獲三千元退休金。