政壇：搞搞政：溫和派嗌「袋住先」 泛民圍插再爆內訌

湯斥泛民乏政治智慧

泛民內部不時出現「捉鬼」疑雲，只要有人講出有關泛民應該「袋住先」嘅言論，即時會畀其他人攻擊到體無完膚，最新一人分屬溫和泛民、人稱「大話湯」嘅公文袋議員湯家驊，佢尋日出席電視節目時再三強調，如果中央承諾二○二○年立會選舉取消功能界別、二○二二年特首普選提名門檻降低至合理水平，佢相信咁代表中央已釋出誠意，會游說港人「袋住先」。大話湯又話否決權係泛民主派唯一嘅政治籌碼，如中央唔容許港人喺一七年有真普選，希望退而求其次改為爭取取消功能界別，否則佢就算離開立法會都「死唔眼閉」。

但俗語有云，哀莫大於心死，大話湯坦言做咗十一年立法會議員，呢件事令佢見識到泛民唔適合從政之餘，亦無乜政治智慧，認為佢哋大聲疾呼推翻人大決定完全無意義，只會將自己逼埋牆角，最後只會「無彎轉」，又強調政改係嚴肅憲制問題，唔係建制同泛民嘅口舌之爭，希望輿論可以迫使泛民重返談判桌同中央溝通。

除此以外，資訊科技界議員Charles莫乃光同白鴿黨前副主席Dick狄志遠日前亦發表疑似「袋住先」嘅言論，其中前者話即使依家要「袋住爛橙」，屆時有機會拿「靚橙」回來，但好短時間內就轉口風，重申唔會接受人大決定框架下嘅政改方案，後者甫開腔亦已經即時畀人圍插。

白鴿黨主席劉慧卿出席論壇時話，尊重議員表達自由，但黨內無討論過大話湯嘅建議，亦唔會接受政府假借普選功能界別甩身喎。話時話，政府嘅政改決議案都未出台，泛民內部已經鬧得四分五裂，相信爭拗陸續有來。