政壇：機電署舊總部改劃 波波唔敢歎慢板
政府成日話好難搵地起樓，新界東北發展計劃又阻礙重重。牽涉到收地問題，當然遇到好多阻力，但屬於政府地嘅話，發展局局長「波波」陳茂波仲點敢怠慢。話說位於銅鑼灣加路連山嘅機電工程署舊總部上月初正式「熄燈」，政府擬盡快更改「加山舊總部」嘅土地用途，避免浪費價值逾百億嘅地皮。波波尋日就喺網誌話，舊總部提供嘅空間同設施有限，無法同署方嘅發展並進，同時本港對住宅、辦公室、零售同酒店等空間需求殷切，改劃用地將為區內帶來新景象，有利發展。
陳茂波話會盡快改劃「加山舊總部」嘅土地用途，避免浪費價值逾百億嘅地皮。（資料圖片）
陳茂波
審計轟拖延逾十年
老實講，當局喺○一年向立法會申請撥款，將機電工程署總部由銅鑼灣遷往九龍灣，以騰出地皮闢作商業用途。地皮原定喺○四至○五年度騰空，但機電署一直拖延逾十年，遭審計署炮轟。所以話呢，波波都知衰喇，若果再歎慢板，肯定又畀市民鬧爆。
