政壇：肥佬黎龜縮為食唔遊行
民陣尋日發起佔領行動後首個大型遊行，「搞事四人幫」只有外號「李漢奸」嘅民主黨創黨主席李柱銘同天主教香港教區前主教陳日君二人現身，而陳日君離開時更違法於雙黃線上車；另外兩名「搞事四人幫」成員，被指係佔中幕後「黑手」嘅壹傳媒集團前主席「肥佬黎」黎智英龜縮唔參加遊行，寧可等到晚上出動去中環食晚飯，「民主阿婆」、前政務司司長陳方安生更係全日不見蹤影，其助理聲稱佢唔喺香港。
黎智英尋日龜縮唔參加遊行，但就同屋企人去中環食晚飯。
陳日君違法喺雙黃線上車搭的士，擺明視法律如無物。
「搞事四人幫」只有陳日君（左二）同李柱銘（右二）兩人參加遊行。
肥佬黎喺佔領期間常留喺「皇座」抽水，尋日有遊行反而選擇龜縮匿喺屋企，至晚上六點十五分，佢同家人坐七人車離開何文田寓所，去中環雲咸街一間會所食飯，當座駕駛往中環途中，更一度行經遊行隊伍經過嘅路線，不過佢都係無落車參與遊行。而抵達目的地後，肥佬黎戴住鴨嘴帽同頸巾落車，被問到點解唔參與遊行，肥佬黎顯得非常唔耐煩，只係答咗一句「無呀，無嘢講呀」，之後就同家人先後進入會所。
李漢奸沿途抽水
講番今次遊行，李柱銘於開始前有份上台講嘢，在場人士亦有叫陳日君上台發言，但佢最終都係無上。遊行開始後，李柱銘打頭陣拉住大會嘅旗幟行頭位，而陳日君就跟隨天主教正義聯盟嘅隊伍起步，兩人邊行邊叫口號，沿途又同途人握手、籌款，扮晒親民，不過去到下午五點幾，兩人就急急腳搭的士走人，陳日君更加違法喺雙黃線上車，擺明視法律如無物。
