政壇：林天福打親民牌補鑊
香港機場管理局近年醜聞多多，前年被外界質疑機場商舖招標有利益輸送之嫌，舊年又被批評有營造機場跑道飽和之嫌，藉此爭取各界支持興建機場第三條跑道，近日就有申訴專員公署痛斥處理投訴嗰陣講大話，令機管局形象插水，真係好多trouble（茶煲）。
（設計圖片及對白）
不過，話就話連串負面事件都喺機管局前任行政總裁許漢忠在位時發生，但事有湊巧，喺舊年十月上任嘅新任行政總裁林天福尋日就加入寫網誌嘅「鍵盤戰士」行列，同市民分享機場日常趣事，大打親民牌似乎想搞好公關宣傳工作。
機管局新開嘅網誌叫「『飛』常日誌」，林天福喺網誌嘅「處女作」題為《機場的「旅」與「情」》，文中坦言自己係機場常客，認為機場充滿活力，每日有唔同人懷着唔同心情同期望嚟機場，只要細心留意，就會發現機場有好多動人故事，而香港國際機場就好似一個小城市，喺機場工作的六萬五千幾個員工每日見證旅客嘅故事，所以設立呢個網誌，畀員工分享難忘工作經歷，甚至旅遊趣事，令讀者對機場有更深認識。
自誇港機場夠氣氛
林天福其後又話自己加入機管局後，外遊或公幹都會加倍留意外地機場，舉例指早前去三藩市度假，就大讚當地機場有航空圖書館同博物館，又喺客運大樓展出藝術作品，令成個機場都散發藝術氣息。佢又讚三藩市機場有一群狗仔扮醫生，陪旅客玩嚟解悶，值得學習，但佢都不忘讚番香港國際機場，話好重視旅客體驗，例如聖誕節會舉行魔術表演、聖誕燈光投影等節目，又有節日裝飾，令旅客可以感受節日氣氛。林天福首篇網誌嘅定位係較為軟性，日後如有需要唔知會唔會用嚟釐清事實，大家要拭目以待嘞！
