千里之堤潰於蟻穴,防疫疏忽必定惹禍。全球疫症肆虐,伊波拉及新沙士隨時殺到,加上香港進入流感高峰期,防疫陣線備受考驗,港府究竟點樣應對呢?真係唔講猶自可,一講把幾火。

係人都知,國際機場係本港第一道防疫屏障,責任重大,弊在呢個屏障原來甩甩漏漏,問題多多,直頭好似不設防咁,唔到你唔驚。最匪夷所思嘅係,禁區內用作隔離懷疑感染傳染病旅客嘅所謂負壓房,竟然就係平時供母親餵奶同泵奶使用嘅嬰兒室,即係話,嬰兒室兼做隔離室,你話當局究竟搞邊科吖?

衞生署係咁講嘅,呢間嬰兒室○六年加裝咗隔離設施,供有需要時使用,日前有旅客懷疑感染傳染病,要臨時使用呢間隔離室,後來證實只係虛驚一場喎。

嗱,係咪虛驚姑且唔講,最奇怪嘅係,點解咁大個機場居然搵唔到適當地方做隔離病房,而要同母嬰爭地方呢?萬一因此傳播病毒,豈不是弄巧反拙?到時邊個孭鑊呢?

唔好話杞人憂天吖,就算唔講流感高峰期,近年各種奇難雜症層出不窮,防不勝防。舊年有位女士由非洲返港,抵埠後即出現發燒、頭暈及嘔吐徵狀,雖然最後證實同伊波拉冇關,但唔係次次都咁好彩o架,大吉利是講句,萬一呢間隔離室事後清潔消毒唔夠徹底,唔止媽咪同嬰兒隨時中招,而且可能導致病毒擴散,引發大規模疫症,好似當年沙士,咁就嗚呼哀哉喇。

有立法會議員就講得啱嘞,機場有足夠地方設立獨立隔離室同嬰兒室,當局將兩者共用一室,簡直係第三世界嘅做法。其實計太一叮話齋,港產官僚渾渾噩噩,求求其其,防疫水平可能連第三世界水平都達唔到添。

呢,今次流感高峰期係近五年來最嚴重,累計已經超過八十人死亡,可惜當局防疫搞到一鑊泡,錯漏百出,連疫苗有冇效都唔清唔楚,令公立醫院急症室日日逼爆,內科病床使用率更加超晒額,唔怪得死得人多喇。

即係咁,當局事後知衰,決定唔再共用機場嬰兒室同隔離室,總算係亡羊補牢,不過咁,今次事件已足以證明港產官僚反應遲鈍,後知後覺,以第三世界嘅管理水平防疫,實在好難令人放心囉。講到底,官僚係靠唔住嘅喇,市民最緊要自求多福吖,叮!

第一手消息請下載on.cc東網iPhone/iPad/Android/Windows Phone Apps