政壇：搞搞政：預算案撞正政改 鬍鬚曾難逃拉布

財金官員形容「大鑊」

立法會「拉布」成風，今年仲有消息話，預算案將會進一步削減一次性嘅「派糖」措施，包括寬免薪俸稅、差餉、綜援同生果金「出雙糧」、公屋免租等，唔使問，民粹為先嘅泛民政黨肯定又要玩嘢，有負責預算案嘅官員已經唔多睇好前景，仲用「大鑊」嚟形容添！

事關預算案一般會喺四月交由立法會辯論，咁啱政改第二階段諮詢結果亦會喺四月出爐。估計泛民到時將會就預算案同政改進行綑綁式「拉布」，要求政府撤回人大常委會「八三一」決定，所以唔使問「拉布」一定惡劣過去年。

泛民唱反調，建制派亦未必會好似過往咁為政府護航，因為區議會選舉年底舉行，明年又係立法會選舉，建制派都要顧住基層選票，兩邊唔留手，預算案係咪更加難過呀？記得去年立法會「拉布」戰打到六月先落幕，幾乎令到全港綜援戶、十幾萬公務員冇糧出，今年又會點？鬍鬚曾真係有排忟呀！