政壇：泛民為佔領找數 夾二千蚊呻肉赤
佔領行動結束多時，卻剩低大把手尾。自從佔中三子率先撤離金鐘佔領區後，佔領區所有開支就由學聯、學民思潮、泛民政黨同民間團體攤分，但原來一直係由民間團體幫手墊支部分款項，有關開支累計達十幾萬元。近日有關團體要求其他三方找數，結果二十三名泛民飯盒會成員每人要畀二千元。
佔領期間示威者大搞活動，燒咗唔少錢。（資料圖片）
據講，四方認頭嘅團體每方要攤分嘅總數約為四萬六千元，泛民政黨因為唔按黨除番條數，而係由二十三個泛民議員平分，最後就訂出每人要畀二千元。有泛民議員知悉後牙痛咁聲，月薪成九萬蚊嘅議員為二千元咁肉赤，真係有啲過分，話晒呢個世界冇免費午餐噃，或者當初唔搞佔領行動咪一毫子都唔使出囉。
而且，泛民議員拖到行動結束後兩個幾月先後補，已經夠晒縮骨喇。
