新一屆區議會將會喺十一月選舉,泛民同建制派政黨都早早派出社區主任落定區,白鴿黨尋日舉行社區主任交流日,邀請黨內有豐富地區經驗嘅區議員分享落區心得,黃大仙區議員兼立法會議員胡志偉應邀傳授經驗,佢先以追女仔比喻區議會選舉,寄語社區主任要好似深愛另一半咁愛區內居民,先至可以成功奪得芳心。不過,講講吓就變咗質,仲將議席爭奪戰比喻為「小三」奪愛,佢啲黨友真係多得佢唔少囉。

設計圖片

胡志偉自九九年起出任黃大仙區議員,係白鴿黨內資深區議員之一,三年前仲成功進身立法會,所以,地區經驗唔少。尋日,佢就以過來人身份,向準備參加選舉嘅社區主任傳授心得,如工作要從心出發,如果無乜居民識即係代表地區工作唔夠心機等,對空降兵團或者疏於地區工作嘅人都有一定警醒作用,尤其白鴿黨啱啱換屆,新領導層被指離地,只顧激進爭取普選。

「選區名花有主照搶」

不過,胡志偉嘅發言就似乎比喻失當,佢先以追女仔比喻區議會選舉,認為個男人真係要好愛、好鍾意個女仔,先至會肯諗計、花心思吸引對方注意,仲要鍥而不捨。

但係,跟住佢講到議席爭奪戰就可圈可點喇,佢話有啲選區即使已經「名花有主」,社區主任要做「小三」撬人牆腳更加難上加難,原本佢係話如果對嗰區一啲感情都無根本贏唔到,但「小三」撬牆腳形象負面,尤其區選好多時要深入屋邨撬票,畀啲師奶選民知道你自居小三,真係搵鬼投你票喇!

之後,佢繼續大講偷心奇招,建議啲社區主任平日應把握機會見多啲街坊,用誠意打動對方。唔通胡志偉當年都係用呢招冧掂太太,繼而冧掂選民?但佢太太就肯定唔希望小三用呢招突襲成功。

第一手消息請下載on.cc東網iPhone/iPad/Android/Windows Phone Apps